Væl nøgd við kavaruddingina

Fólk eru væl nøgd við kavaruddningina hjá Landsverki. Tað vísir brúkarakanning,sum landsverk hevur gjørt.

Fyri kavaruddingina fær Landsverk 5,6 stig í miðal, har 7 er tað hægsta. Tað er ein lítil framgongd síðan 2015 og sama úrslit sum í 2016. Tað sæst í ársfrágreiðingini hjá Landsverki.

Kavaruddingin hevur øll árini fingið góð skoðsmál í nøgdsemiskanningunum, sum stovnurin hevur latið gjørt síðani 2008, sigur Landsverk.

Fráboðanin hjá Landsverki um veðrið fær 5,9 stig í miðal hesaferð, sum er ein framgongd í mun til undanfarin ár. 

Men eitt øki, ið ikki fær so gott skoðsmál, er stýringin av almennum byggiverkætlanum. Her er karakterurin 3,7 stig í miðal av 7 møguligum. Tað er ikki eitt nøktandi úrslit, sigur Landsverk. Í viðmerkingunum hjá teimum spurdu sæst, at talan í nógvum førum er um ónøgd við stýringina av verkætlanini Glasi og skúlanum í Hovi - tvær verkætlanir, ið hava verið truplar, og sum hava fylt nógv í almenna kjakinum, sigur Landsverk í ársfrágreiðing sínari.

Landsverk hevur  annað hvørt ár síðani 2008 bílagt nøgdsemiskanningar, har fólk verða spurd, hvat tey halda um tænasturnar hjá Landsverki og um teirra nøgdsemi við stovnin sum heild. 

Seinasta kanningin varð gjørd í januar og februar í ár. 520 tilvildarliga vald fólk eldri enn 17 ár vórðu spurd í kanningini.