Prísurin kann ikki lækka nógv meira

Ferðslan økist støðugt í undirsjóvatunlunum og hevur so við, at tunnilsfelagið hevur ráð at lækka prísin á tunnilsgjaldinum. Tó er tað komið hartil, at prísurin ikki kann lækka nógv meira, sigur Uni Danielsen, stjóri í tunnilsfelagnum.

Fyrsta hálvár í ár koyrdu í miðal 2.354 bilar um dagin gjøgnum Vágatunnilin og 3224 bilar í miðal gjøgnum Norðoyatunnilin. Tað er ein vøkstur upp á gott 120 bilar um dagin í Vágatunnlinum og 225 bilar í Norðoyatunnlinum. Tað vísa hagtøl hjá tunnilsfelagnum.

Tann vøksturin er í tráð við gongdina, sum hevur verið í tunlunum, síðan teir lótu upp. So at siga hvørt ár hevur talan verið um vøkstur í ferðsluni í undirsjóvartunlunum.

Sambært Una Danielsen, stjóra í tunnilsfelagnum, so sæst økingin í ferðsluni fyrst og fremst aftur í privatbilunum, meðan ferðslan av størru akførunum liggur støðug. 

Tunnilsfelagið skrásetir bert akfør, ið koyra úr annaðhvørt Vágum ella Norðoyggjum. Tí kunnu hagtølini ikki staðfesta neyvt, hvussu ferðslan er báðar vegir. Tað eru ábendingar um, at tað er ferðing til og frá arbeiði, ið er mesta ferðslan, tí tað er serliga um morgunin, at nógv ferðsla er.

Tunnilsfelagið fer frá 1. august at lækka prísin fyri túrahaldið niður á tjúgu krónur fyri túrin. Støðugt vaksandi ferðslan hevur øktar inntøkur við sær, og tí hevur felagið kunnað lækka prísin ár undan ári. 

Hóast felagið ikki hevur sum endamál at vinna pening, so er eingin loyna, at felagið hevur tørv á pengum til eitt nú at halda tunlarnar við líka. Tí er ivasamt, hvussu nógv prísurin fer at lækka framyvir.