Berjast enn móti skógareldunum í Kalifornia

Mendocino Complex rópa myndugleikarnir eldarnar - teir eru tveir, Ranch Fire og River Fire. 

Eldarnir eru norðan fyri San Francisco, tætt at hvørjum øðrum. 75 hús eru brend í grund, og fleiri túsund bygningar eru í vanda.

Hóast umfatandi hava eldarnir ikki oyðilagt á sama hátt sum aðrir eldar, og sambært CNN hevur eingin latið lív í Mendocino Complex-eldunum.

Samanlagt herja 16 skógareldar í Kalifornia. Ein teirra, Carr-eldurin, hevur kravt sjey mannalív, síðani eldurin kyknaði tann 23. juli.

14.000 sløkkiliðsfólk stríðast við at fáa bilbukt við mongu eldunum. Talsmaðurin fyri sløkkiliðið í Kalifornia, Scott McLean sigur seg ikki minnast, at so nógv sløkkiliðsfólk hava verið til arbeiðis.

Sambært serfrøðingum er tað heita veðrið og veðurlagsbroytingar, ið eru millum orsøkirnar til mongu skógareldarnar. Tað skrivar AP-tiðindastovan.