Ótolnast eftir menningarkvotunum

Bjørn Kalsø, tingmaður fyri Sambandsflokkin, setti í gjár landsstýrismanninum í fiskivinnumálum ein skrivligan fyrispurning í løgtinginum.

Í nýggju lógini um sjófeingi er heimild givin landsstýrismanninum at luta út 8,5 % av fiskinum, ið kann fiskast av føroyingum, í menningarkvotum.

Bjørn Kalsø spyr millum annað Høgna Hoydal, nær landsstýrismaðurin fekk tilmælið um menningarkvotur frá tilmælisnevndini. Hann spyr somuleiðis, nær roknast kann við, at menningarkvoturnar verða tillutaðar.

Bjørn Kalsø sigur, at undir viðgerðini av lógini í løgtinginum greiddi landsstýrismaðurin frá, at hann í eini handavend, eftir tilmæli frá serfrøðingabólki, fór at tilluta menningarkvoturnar. Men nú væl er liðið á árið, og tilmælið er latið frá serfrøðingabólki fyri tíð síðan, eru ongar menningarkvotur lætnar.

Bjørn Kalsø spyr eisini, hvørji tilmælini eru frá nevndini, býtt á feløg, fiskasløg, nøgd og økir, og um landsstýrismaðurin fer at fylgja teimum neyvt. Hann vil eisini hava at vita, um nýggir aktørar í fiskivinnuni eru millum teirra, ið fara at fáa.