Ungfólk við trupulleikum fáa nú vegleiðara

Tórshavnar býráð og Barnabati hava nú skrivað undir avtaluna um mentorskipan fyri ung.

Ein mentor er ein ráðgevi ella vegleiðari.

Samstarvsavtalan er galdandi í einum royndartíðarskeiði, sum varar til 31.desember 2020.

Yvirskipaða endamálið við mentorskipanini er at geva 12-18 ára gomlum eitt upplýsandi, fyribyrgjandi og mennandi tilboð.

Skipanin er ætlað fólkum, sum hava ymsar trupulleikar og sálarligar ampar at dragast við.

Barnabati umsitur, kommunan fíggjar

Barnabati vendi sær til kommununa um møguleikan fyri samstarvi um slíka mentorskipan. 

Barnabati fer at standa fyri mentorskipanini. 

Til tess at seta mentorskipanina til ung í verk hevur Tórshavnar kommuna játtað 250.000 kr. í ár.

Væntandi fer skipanin at kosta millum 500.000 og 600.000 kr. um árið, sum kommunan, sambært avtaluni, fíggjar.