- Tíðindi, mentan og ítróttur
Viðgera enn tunnilsraðfestingina
![](https://kvf.fo/sites/default/files/styles/grein-ovasta-mynd/public/henrik_old_3.jpg?itok=nJnxABXN)
Landsstýrismaðurin í samferðslumálum vil framvegis ikki siga, um hann fer at gera, sum løgmaður vil hava hann at gera, og bora Dalstunnilin áðrenn Fámjinstunnilin.
Tvørturímóti sigur Henrik Old, at landsstýrið enn umrøður, hvør raðfylgjan skal vera í tunnilsgerðunum.
Løgmaður hevur annars gjørt greitt, at avgerð er tikin, og at Dalstunnilin skal borast áðrenn Fámjinstunnilin.
Í skrivligum svari til grein 52-spurning frá løgtingsmanninum, Bill Justinussen, sum er dagfest í dag, sigur Henrik Old, at hann sum landsstýrismaður "leggur stóran dent á, at ferðasambandið til smærru bygdirnar er nøktandi, og umrøður landsstýrið í hesum døgum, hvør raðfylgja fyri tunnilsgerð er best".
Tað vil siga, at avgerðin hjá Akseli V. Johannesen, løgmanni, í síðstu viku um at skera ígjøgnum tunnilsósemjuna í samgonguni, enn hongur í leysum lofti í landsstýrinum.