Strandferðslan avlýsir túrar vegna vánaligt veður

Vánaliga veðrið í dag hevur við sær, at Strandferðslan avlýsir túrar bæði hjá bygda- og oyggjaleiðum. 

Marin Gaardlykke, ferðslusamskipari, hjá Strandferðsluni, sigur við útvarpið, at bygdaleið 701, sum koyrir millum Tvøroyri, Fámjin og Sandvík, koyrir ikki meira í dag. Hetta er fyribils einasta bygdaleiðin, sum er avlýst.

Harafturat hevur Strandferðslan fyribils avlýst túrarnar hjá oyggjaleið 66, sum siglur millum Sandoy og Skúvoy. Tað er møguligt, at leiðin verður tikin upp aftur seinni, um veðrið batnar, sigur Marin Gaardlykke.

Á leið 58, sum siglir millum Hvannasund, Svínoy og Fugloy, eru broytingar, og tað verður ikki siglt til Fugloyar í dag.

Sambært ferðslusamskiparinum hjá Strandferðsluni verða tað møguliga fleiri broytingar á ferðaætlanini í dag, eitt nú vænta tey møguligar broytingar hjá bygdaleiðum, tað vil siga á bussrutunum kring Føroyar. 

- Fyribils kunnu vit siga, at tað kunnu væntast avlýsingar, sigur Marin Gaardlykke, ferðslusamskipari hjá Strandferðsluni.

Broytingar, sum koma fyri, verða dagførdar á heimasíðuni hjá Strandferðsluni.

Nógvur vindur kring landið

Veðurstovan sigur frá nógvi vindi í dag, og Landsverk fráboðar frá nógvum vindi á fleiri vegateinum í landinum:

Gjáarskarð - kl. 09:39 Skrið, í hvirlunum upp til 28 m/s 

Heltnin, Oyndarfjarðarvegurin - kl. 09:49 Skrið, í hvirlunum upp til 31 m/s 

Norðskálatunnilin, Eystanfyri - kl. 09:43 Hvassur vindur, í hvirlunum upp til 28 m/s 

Høgareyn - kl. 09:44 Hvassur vindur, í hvirlunum upp til 33 m/s 

Oyggjarvegur við Norðadalsskarð - kl. 09:33 Skrið, í hvirlunum upp til 38 m/s 

Hvalba - kl. 09:49 Skrið, í hvirlunum upp til 37 m/s 

Ørðaskarð, Fámjinsvegurin - kl. 09:45 Hvassur vindur, í hvirlunum upp til 38 m/s 

Porkerishálsur - kl. 09:41 Stormur, í hvirlunum upp til 35 m/s

Mælt verður til at koyra varliga á nevndu støðum.