Sløkkiliðið kostar ov nógv men fær eykatáttan

Sløkkiliðið í Fuglafirði kostar nógv meira enn sløkkiliðini í kommunum, sum Fuglafjørður kann samanbera seg við.

Hetta stendur í gerðarbókini hjá býráðnum, sum viðger eina umsókn frá sløkkiliðinum um eykajáttan í 2018.

Sløkkiliðið biður um 300.000 kr. afturat til raksturin í ár.

Í fjør brúkti sløkkiliðið 554.000 kr. meira til raksturin enn býráðið upprunaliga játtaði.

Fyrisitingin spurdi kommunur, sum Fuglafjørður kann samanbera seg við, hvussu nógv, tær brúka til sløkkilið.

Kostar ov nógv

Úrslitið er, at Fuglafjørður brúkar væl meira til sløkkiliðið enn hinar kommunurnar, stendur í gerðarbókini frá býráðsfundium í síðstu viku.

Fíggjarnevndin mælti tó til at lata eykajáttanina, tí pengarnir hjá sløkkiliðinum voru uppi, tá farið varð inn í fjórða ársfjórðing, og tað er lógarkrav, at kommuna hevur neyðuga tilbúgving alt samdøgrið alt árið.

Seinna og endaliga viðgerðin verður á býráðfundinum 29.november.

Eykajáttanin verður tikin av gjaldførinum hjá kommununi.