Ósemja um ognina hjá gamla Barnaheiminum

Semja er ikki um ognirnar hjá sjálvsognarstovninum Føroya barnaheim, nú landið ætlar at byggja eitt barnaheim í Havn.

Fíggjarnevndin hjá løgtinginum heldur vera umráðandi, at landsstýrið fær avgreitt øll formlig og fíggjarlig viðurskifti við sjálvsognarstovnin, áðrenn farið verður at byggja nýtt barnaheim.

Samstundis skal landsstýrið skipa fyri, at ognin hjá verandi barnaheimi fer upp í verkætlanina at bygga nýtt barnaheim sum stovnsfæ.

Men semja er ikki enn millum Almannamálaráðið og sjálvsognarstovnin um ognirnar hjá Barnaheiminum. 

Stýrið fyri sjálvsognarstovnin góðtekur ikki, at ognirnar verða latnar landinum uttan samsýning.

Millumloysn

Samráðingar eru nú um eina millumloysn.

Stýrið hevur boðað frá, at tað vil samráðast um, hvussu og í hvussu stóran mun stýrið kann vera við til at fíggja nýtt barnaheimin.

Men treytin er, at stýrið fyrst fær ein leigusáttmála við Almannamálaráðið ella Almannaverkið um bygningin hjá Barnaheiminum og økið við Pedda við Steinsgøtu í Havn.

Tað merkir, at landið rindar húsaleiga, so grundarlag er fyri at fara undir mest átrokandi viðlíkahaldið og annars vanligt viðlíkahald.

Tá hesi viðurskifti eru komin í rættlag, er stýrið sinnað at venda aftur til málið um at vera við til at til fíggja nýtt barnaheim, hevur Fíggjarnevndin fingið at vita frá Almannamálaráðnum.