Stremba eftir at børn og ung ikki verða innløgd

Í ár hava trý fólk undir 18 ár verið løgd inn á Psykiatriska depilin á Landssjúkrahúsinum, men strembað verður altíð eftir, at børn og ung ikki verða løgd inn.

Í teimum førum, neyðugt verður at leggja ungfólk inn á Psykiatriska depilin, verður skipað soleiðis fyri, at eitt starvsfólk burturav altíð er um sjúklingin.

Eisini verður borið soleiðis í bandi, at annað av foreldrunum verður lagt inn saman við barninum.

Tað sigur Sirið Stenberg, landsstýriskvinna í heilsumálum, sum hevur svarað einum fyrispurningi frá Kaj Leo Holm Johannesen í Sambandsflokkinum.

Ein serlækni í barna- og ungdómspsykiatri er settur aftrat, og økið er uppraðfest við einum sálarfrøðingi og einum sjúkrarøktarfrøðingi. 

Arbeiða við loysn

Løgtingsins umboðsmaður kom í summar við eini frágreiðing um umstøðurnar hjá børnum, sum verða løgd inn á Psykiatriska depilin.

Eitt av tilmælunum var, at børn skulu ikki verða løgd inn saman við vaksnum.

Sirið Stenberg sigur, at Landssjúkrahúsið hevur síðani arbeitt við einari loysn. Hon er, at nýskipaða dagtilboðið eisini skal fevna um innleggingar um kvøldið og náttina.

Í fíggjarlógaruppskotinum fyri 2019 verður lagt upp fyri at víðka dagtilboðið til børn og ung.

Psykiatriin flytur í nýggja bygningin á Landssjúkrahúsinum um tvey ár, og tá verða hesar avbjóðingar loystar, sigur Sirið Stenberg í svarinum til Kaj Leo Holm Johannesen.