Ukreina stúrir fyri kríggi

Støðan gerst alsamt spentari millum Russland og Ukreina. Nú ávara russarar ímóti avleiðingunum av undantaksstøðuni, sum Ukreina setur í gildi í dag.

Ukreinski forsetin, Pedro Porosjenko, sigur í samrøðu í ukreinskum sjónvarpi, at myndugleikarnir fara at brúka allar mátar at fáa teir 24 ukreinsku sjó-hermenninar leysar aftur, sum russiska sjóverjan handtók sunnukvøldið, tá hon legði hald á trý ukreinsk sjóverjuskip í Kertsj-sundinum við Krim-hálvoynna.

- Vit fara framhaldandi at stríðast fyri at fáa ukreinararnar latnar leysar úr russiskum fongslum, tí eg eri sannførdur um, at falskar skuldsetingar verða reistar móti teimum, sigur Porosjenko í samrøðuni, sum Reuters hevur víst brot úr.

- Eftir hendingina í Kertsj-sundinum, mugu vit tryggja okkum, at ukreinskar herdeildir kunnu verja ímóti stórari innrás. Russisku stríðsvognarnir eru ikki tiknir aftur enn. Teir standa á markinum millum Russland og Ukreina, og tí ávari eg ímóti at síggja hetta sum eitt spæl. Álvarslig hóttan er um kríggj við russiska samveldið, sigur Porosjenko í samrøðuni.

Merkel mælir til dialog

Russland vikast ikki, og ávarar hvassliga móti undantaksstøðuni, og setur hart ímóti hørðum. 

Angela Merkel ringdi mánakvøldið til ukreinska forsetan, Pedro Porosjenko, og síðani til russiska forsetan, Vladimir Putin.

Í telefonsamrøðuni segði Putin, at hann er sera ørkymlaður um avgerðina í Kiev um undantaksstøðu, og vónar, at Berlin kann sannføra ukreinskar myndugleikar um, at teir ikki mugu gera fleiri fyrilitaleysar gerðir.

- Undantaksstøðan merkir ikki, at vit melda kríggj, tryggjaði ukreinski forsetin. 

Talsmaðurin fyri týsku stjórnina, Steffen Seibert, segði eftir samrøðuna, at Merkel hevði lagt dent á niðurtrappin og dialog.

Kertsj-sundið er einasta farleið til Azov-havið, og tað býtur sundur Russland og Ukreina.