Fer at biðja tingið um loyvi at siga upp sáttmála

Landsstýrismaðurin í uttanríkis- og vinnumálum, Poul Michelsen, fer fyrsta dagin at biðja løgtingið um loyvi til at siga Hoyvíkssáttmálan upp.

Uppskot til samtyktar um heimild at siga upp Hoyvíkssáttmálan varð sent til hoyringar í gjár.
 
Hoyringarfreistin er sera stutt. Hon er til middags í morgin.

Hoyvíkssáttmálin við Ísland varð gjørdur á sumri 2005.

Men fyri einum ári síðani kom so lógin um, hvussu sjófeingið skal fyrisitast, tað er fiskivinnunýskipanin.

Og sambært henni kunnu útlendingar ikki eiga í føroyskum fiskiskipum.

Hesum hava íslendingar mótmælt, tí lógarásetingin er brot á Hoyvíkssátmálan, verður sagt haðani.  

Men lógin um sjófeingi verður ikki broytt. Útlendingar skulu úr fiskiflotanum í Føroyum sum frá líður, íslendingar fingu sjey ára skiftistíð.

Landsstýrið hevur í brævi til íslendsku stjórnina 30.november gjørt greitt, at eydnast ikki at tillaga Hoyvíkssáttmálan, kann verða talan um at siga sáttmálan upp. 

Hetta varð gjørt eftir ráðførslu við Uttanlandsnevndina tann 29.november.

Samhandilin skal halda fram

Fær landsstýrismaðurin í uttanríkis- og vinnumálum heimild frá løgtinginum til at siga upp Hoyvíkssáttmálan, kann fráboðan um uppsøgn verða send íslendsku stjórnini í seinasta lagi 31.desember í ár.

Endamálið við uppsøgnini er ikki at koma í ta støðu, at als eingin sáttmáli skipar viðurskiftini og serliga handilin millum Ísland og Føroyar. 

Landsstýrið fer at virka fyri at fáa semju við íslendsku stjórnina um nýggjan sáttmála fyri at tryggja, at samhandilin millum partarnar kann halda fram, samstundis sum samsvar er millum sáttmálagrundarlagið og føroyska lóggávu. 

Hetta krevur tó semju millum báðar partar, sigur landsstýrismaðurin.