Mynstringarbannið ímóti Arctic Voyager stendur við

Mynstringarbannið, sum tey trý manningarfeløgini lýstu ímóti uppsjóvarskipinum Arctic Voyager, stendur við.

Men bannið er bara galdandi, um skipið fer at fiska makrelkvotuna, sum trolbátarnir í bólki 4 eiga.

Annfinnur Garðalíð, formaður í Føroya skipara og navigatørfelag sigur, at reiðarin hevur heitt á feløgini um at taka mynstringarbannið aftur, men tað verður ikki gjørt.

Arctic Voyager hevur verið á svartkjaftaveiðu og er á veg á Fuglafjørð við 1700 tonsum. Skipið kann fiska svartkjaft, tí har er sáttmálin greiður.

Men skipið sleppur ikki at fiska makrelkvotuna hjá trolbátunum, tí har er eingin sáttmáli, sigur Annfinnur Garðalíð.