Snarfrost tekur ímóti makreli frá Katrini Jóhonnu

Seinnapartin í morgin fer Snarfrost í Miðvági at taka ímóti fyrstu lastini av makreli frá uppsjóvarskipinum Katrin Jóhonnu, sum hevur menningarkvotu.

Skipið kom á Miðvág seinnapartin við 300 tonsum av makreli, sum eru fiskað í ES-sjógvi.

Avtala við Vestmanna Fiskavirki

Árni K. Dalsgaard, skipari á Katrin Jóhonnu og nevndarformaður í felagnum, sum eigur skipið, sigur, at hetta er ein roynd hjá virkinum at taka ímóti, og eydnast tað ikki virkinum at taka ímóti øllum 300 tonsunum, hevur felagið fingið loyvi at flyta tað, sum loypir av, til Vestmanna Fiskavirki at taka ímóti.

Felagið, sum eigur Snarfrost, eigur helvtina felagnum Kinnfelli, ið eigur Katrin Jóhonnu. 

Sambært loyvinum frá Fiskimálaráðnum kann Katrin Jóhanna fiska tilsamans 1500 tons av makreli í ár, bæði í ES-sjógvi og í føroyskum sjógvi, sigur Árni K. Dalgsaard.