Tjóðveldi vil halda fram í fólkatinginum

Semja er ikki í flokkinum um uppstilling til fólkatingsval, men eykaflokstingið samtykti tó, at flokkurin stillar upp. Aðalstjórnin hjá Tjóðveldi fekk heimild at gera av, hvussu stillast skal upp.

Aðalstjórnin skal í samráði við økisfeløgini hjá flokkinum gera av, hvørji og hvussu nógv valevni skulu á listan og gera valskránna lidna.

Á eykaflokstinginum greiddi Magni Arge frá arbeiðinum hjá Tjóðveldi í fólkatinginum tey seinastu skjótt fýra árini. 

Viðtøkurnar krevja samtykt um val

Sambært viðtøkum Tjóðveldis skal eykafloksting gera av, um stillast skal upp til fólkatingsval.

Tjóðveldisflokkurin, sum varð stovnaður í 1948, stillaði upp til fólkatingaval fyrstu ferð í 1960. Hann stillaði tó ikki upp í 1964, 1966, 1968 og 1971.

Men síðani hevur hann stillað upp til hvørt fólkatingsval. Tjóðveldi varð størsti flokkur í Føroyum á fólkatingsvalinum 18.juni í 2015.

Høgni Hoydal, floksformaður, varð valdur í folkatingið í 2015. Men næsta maðurin á listanum, Magni Arge, hevur verið í fólkatinginum í valskeiðinum.