Alt ov stutt hoyringarfreist hjá landsstýrinum

Landsstýrið heldur ikki sína egna áseting um hoyring, tá uppskot eru gjørd um lógir og kunngerðir.

Sambært heimasíðuni hjá løgmanni eiga lógaruppskot, kunngerðir og ríkislógartilmæli altíð at verða send til ummælis hjá øllum viðkomandi pørtum.

Vanliga eigur tíðarfreistin at lata inn ummæli at vera fýra vikur. Henda freist eigur ikki at verða skerd, uttan so at tað er átrokandi neyðugt. 

Síðani á nýggjárinum hevur landsstýrið sent 31 uppskot til hoyringar.

Ov stutt freist

Í 27 førum hevur hoyringarfreistin verið styttri enn fýra vikur, í nógvum førum nógv styttri enn fýra vikur.

Í onkrum føri er hoyringarfreistin bara fýra dagar.

Landsstýrið brúkar sum undanførslu, at seinasti framløgudagur er 7.mars.

Men løgtingið skal tó hava tey mál, sum skulu leggjast fram seinasta framløgudag, í seinasta lagi nú hósdagin, sum er 28.februar, á middegi.

Mál, sum skulu viðgerast í tingsetuni, men ikki eru komin løgtingsskrivstovuni í hendi á middegi hósdagin, mugu hava 17 undirskriftir fyri at verða løgd fram.