Røktarheim og nýggjur býarpartur í Havn

Tað mælir umsitingin hjá Tórshavnar kommunu til. Málið er samtykt bæði í Byggi- og býarskipanarnevndini og í Fíggjarnevndini. Tað er á skránni fyri býráðsfundin nú hóskvøldið.

Í oktober 2017 samtykti býráðið at seta bygginevnd at útvega byggiskrá til røktarheim og røktaríbúðir. Røktarheimið verður 6.600 fermetrar. Har verða 64 búpláss og 16 røktaríbúðir.

Økið, sum umsitingin hjá býráðnum vísir á at brúka til røktarheim og røktaríbúðir, er oman fyri býlingin undir Fjalli. Býráðið hevur ætlanir um at gera Marknagil til ein býarpartsdepil.

Í býarpartsdeplinum verða matvøruhandlar, stovnar, skúlar og onnur útbúgving, býlingshús og høli til mentanarligt virksemi.