Barnaheimið neyvan avgreitt í hesari tingsetuni

Skipanaruppskotið um Barnaheimið, sum skal byggjast í Hoyvík, verður ikki líðugt fyrr enn í summar.

Tað fekk Fíggjarnevndin hjá løgtinginum at vita fyrrapartin.

Tí er lógaruppskotið um Barnaheim, sum er í Fíggjarnevndini, ikki búgvið, sigur formaðurin í Fíggjarnevndini, Bárður á Steig Nielsen.

Hann sigur, at hann fer at mæla til, at Eyðgunn Samuelsen, landsstýriskvinna, tekur uppskotið aftur.

Ger hon ikki tað, fer Bárður á Steig Nielsen at biðja løgtingið um at fella uppskotið.

Í summar

Eyðgunn Samuelsen, landsstýriskvinna, var saman við Landsverki í Fíggjarnevndini fyrrapartin.

Nýggja Barnaheimið verður 20 milliónir krónir dýrari enn tað, sum stendur í uppskotinum. 

Nú er metingin, at Barnaheimið fer at kosta 85 milliónir krónur.

Og einki skipanarauppskot var við lógaruppskotinum. Tað verður ikki liðugt fyrr enn í summar, hevur Figgjarnevndin nú fingið at vita.

Landsgrannskoðanin og fíggjarnevndin eru samd um, at skipanaruppskot skal verða gjørt, áðrenn lógaruppskot verða latin løgtinginum.