Linari revsing í Grønlandi enn í ríkinum annars

Lógin er broytt í royndunum at forða fyri, at pengar verða hvíttaðir. Í Grønlandi er harðasta revsing sekt. Í Føroyum og Danmark er harðasta revsing fongsul í mesta lagi í seks mánaðir.

Sambært grønlendska kringvarpinum, KNR, gjørdi Grønlandsnevndin hjá fólkatinginum vart við hetta í álitinum. Nevndin stúrir fyri, at Grønland verður brúkt til at hvítta pengar, tí revsingin har er linari enn aðrastaðni.

Loyvir ikki fongsul

Kriminallógin í Grønlandi loyvir bara sekt. Revsilógin í Føroyum og í Danmark loyvir fongsulsrevsing, tá lógarbrotið er serliga grovt.

Grønlandsnevndin hjá fólkatinginum biður donsku stjórnina um at samráðast við landsstýrið um revsingina fyri at hvítta pengar.

Fólkatingið samtykti annars í gjár lógirnar fyri Grønland og Føroyar um at flyta pengar millum lond. Í Danmark hevur lógin verið galdandi í nøkur ár. Hon byggir á ES-reglur.