Gomul føroysk skjøl almannakunngjørd

Talan er um føroysk skjøl úr Rigsarkivet, sum eru næstan 128.000 í tali. Almenningurin kann hyggja í skjalagoymsluna á heimasíðuni hjá Ríkisskjalasavninum, á www.sa.dk.

Skjølini fevna um skjøl frá Dansk Kancelli heilt aftur til 1583, umframt prestakalls-bøkur. Har er eisini eitt stórt skjalasavn frá Kongiliga Einahandlinum, og tann elsti parturin av skjølum frá Løgmálaráðnum, sum umsat føroysk mál frá 1849 til 1935.

Haraftrat koma fólkateljingar, deyðsattesir frá 1871 til 1971 og "Medicinalindberetninger” frá 1817 til 1944. 

Arbeiðið heldur fram alt árið

Ríkisskjalasavnið gjørdi eitt líknandi átak herfyri, tá øll kend skjøl viðvíkjandi Vestindisku oyggjunum vóru talgild og løgd á netið.

Tað var millum annað hetta, sum gav Magna Arge, fólkatingslimi, íblástur til at fáa eitt samstarv í lag millum danska ríkisskjalasavnið og føroyska landsskjalasavnið um at talgilda skjølini um Føroyar.

Skjalagoymslan, sum er almannakunngjørd í dag, er bara partur av tí samlaðu føroysku skjalagoymsluni. 

Arbeiðið, at avmynda føroysku skjølini á Ríkisskjalasavninum, heldur fram alt árið, og tá tað er liðugt, verður tað mesta av tilfarinum um Føroyar, sum liggur á Ríkisskjalasavninum, tókt at leita í á netinum, sigur Magni Arge, fólkatingslimur.