Kanna um ákærur skulu reisast

bannari
20.05.2019 - 12:04
AktueltSamfelag
Kanna um ákærur skulu reisast
Ákæruvaldið skal kanna, um ákærur og endurgjaldskrøv skulu reisast eftir byggigølurnar á Glasi og H-bygninginum á Landssjúkrahúsinum
 

Ákæruvaldið skal nú kanna, um ákæra og endurgjaldskrav skal reisast ímóti ábyrgdarfólkum á Landsverki, eftir byggigølurnar á Glasi og á H-bygninginum á Landssjúkrahúsinum. Tað boðar Samferðslumálaráðið frá í tíðindaskrivi fyri løtu síðani.

Eftir at tað er komið undan kavi í sambandi við H-bygningin hjá Landssjúkrahúsinum, at bundin peningur er brúktur til onnur endamál, enn hann varð játtaður til, heitti Heðin Mortensen, landsstýrismaður í samferðslumálum, á Jógvan Páll Lassen, advokat, um at hyggja nærri at umstøðunum í sambandi við Glasir og H-bygningin. 

Niðurstøðan hjá advokatinum er greið. Hann mælir landsstýrismanninum í samferðslumálum til at heita á ákæruvaldið um at kanna, bæði viðvíkjandi Glasi og H-bygninginum, um grundarlag er fyri at reisa ákæru, og samstundis at kanna, um møguleiki er fyri at reisa endurgjaldskrav móti viðkomandi persónum á Landsverki.

Fylgir niðurstøðu hjá advokati

Landsstýrismaðurin í samferðslumálum hevur gjørt av at fylgja niðurstøðuni hjá advokatinum.

“Leikluturin hjá Landsverki í hesum báðum byggiverkætlanunum hevur higartil í besta føri verið ivasamur. Tað er álvarsamt, at bundin peningur er brúktur til onnur endamál, enn hann varð játtaður til. Eg haldi ikki, at vit politikkarar skulu sita hendur í favn og góðtaka, at slíkt fer fram."

"Vit kunnu ikki áhaldandi lata alt um okkum ganga, tí tá ið avtornar verður tað føroyski skattgjaldarin, sum verður noyddur at rinda meirkostnaðin í sambandi við báðar verkætlanirnar," sigur Heðin Mortensen, landsstýrismaður í samferðslumálum.

Nú ákæruvaldið hevur fingið málið, hevur Heðin Mortensen, landsstýrismaðurin í samferðslumálum, ikki fleiri viðmerkingar til málið.

 
Nýggjastu sendingar í ÚV
Sunnudag 17. november
Credo: Exoplanetur
100894
Leygardag 16. november
Tá guillotinan framvegis virkaði
100187
Leygardag 16. november
Kjakaríið: Herborg, Andras og Sóley
101146
Leygardag 16. november
Leygardagur 16. november 2019
101141
Nýggjastu sendingar í SV
Leygardag 16. november
Andaktin
101148
Mánadag 11. november
3-2
100936
Sunnudag 10. november
Andakt við Jákup Eli Østerø
100878
Sunnudag 10. november
Stórmøti í Høllini á Hálsi
100880