Mugu broyta drykkjuvanar hjá børnum og ungum

Í fleiri ár er rúsdrekkanýtslan hjá donskum ungdómi minkað, men nú er lítil vøkstur aftur at hóma. Í frágreiðing frá Vitanaráðnum fyri fyribyrging er niðurstøðan, at okkurt má gerast við drykkjuvanar hjá børnum og ungum, skrivar Politiken.

Meira enn 8 av 10 dreingjum og gentum hava drukkið rúsdrekka sum 15 ára gomul, og tað er munandi vøkstur síðani 2014, stendur í frágreiðing um rúsdrekkamentan hjá ungum, sum verður almannakunngjørd í dag.

Í frágreiðingini hevur ein bólkur av granskarum og professarum savnað danskar og altjóða kanningar og mátingar í sambandi við sunnari rúsdrekkamentan.

Mæla til at hækka aldursmarkið upp í 18 ár

Fokusøkið í frágreiðingini er drykkjuvanin, har nógv rúsdrekka verður drukkið í einum. Danski ungdómurin er evropameistari í at drekka seg frá viti og skili, men hetta skal nú broytast.

Eitt av týdningarmiklu tilmælunum hjá Vitanarráðnum er at hækka aldursmarkið í Danmark at keypa rúsdrekka upp í 18 ár. Sum er, kunnu 16 ára gomul keypa rúsdrekka, ið er veikari enn 16,5 alkoholprosent. 

Kanning frá 2017, sum danska Krabbameinsfelagið hevur almannakunngjørt, vísir, at 39 prosent av teimum 15-18 ára gomlu seinasta árið hava keypt rúsdrekka, sum tey ikki vóru nóg gomul til at keypa.

– Aldursmarkið verður als ikki hildið, men hetta mugu vit kanna, um vit skulu fyribyrgja trupulleikan, sigur Janne Tolstrup í Vitanarráðnum fyri Fyribyrging, við Politiken.