Útbyggja nú havnarlagið fyri hálva milliard

Tað kostar meira enn upprunaliga ætlað at víðka Skansabryggjuna og Eystara havnarøkið í Havn.

Býráðið skal í annaðkvøld avgera, um 34,7 mió. kr. skulu játtast afturat til arbeiðið.

Arbeiðið fer so at kosta 500 milliónir krónur.

Býráðið samtykti í 2016 at játta 465 mió. kr. til at víðka Skansabryggjuna og Eystara havnarøkið.

Av tí, at grótið er sokkið nakað í botninum - hevur sett seg - eru næstan tíggju milliónir krónur meira enn ætlað brúkt til grót.

Semja gjørd

Sambært dagsskránni fyri býráðsfundin í annaðkvøld, hava nógvar ymiskar óvissur verið millum arbeiðstakaran, J&K Petersen, og arbeiðsánaran, sum er Tórshavnar havn. 

Samráðingar hava verið millum partarnar, so tað, sum er eftir at gera, verður gjørt fyri fastan prís, prísvøkstur og lønarvøkstur eru tó undantiknir.

Upprunaliga tilboðið frá J&K Petersen var 387 mió. kr. Byggifelagið fær 413 milliónir krónur fyri arbeiðið.

Fyrri parturin av Skansabryggjuni verður latin 22. oktober í ár.

Endaliga avhendingin verður 15. mai næsta ár.