Trump: Nato skal eisini fevna um Miðeystur

NATO eigur at verða víðkað og eisini at fevna um lond í Miðeystri.

Tað sigur amerikanski forsetin, Donald Trump.

Aðalskrivarin í verjusamgonguni, Jens Stoltenberg, sigur, at mett eigur at verða um tann møguleikan.

USA hevur havt ein stóran leiklut í stríðnum ímóti Islamskum Stati, segði amerikanski forsetin.

Gjørt Evropa tænastu

- Vit hava gjørt Evropa eina stóra tænastu, og tí haldi eg, at NATO eigur at vera víðkað, til eisini at fevna um lond í Miðeystri. Og samstundis átti NATO at broytt navn til NATOME, ella NATO-Middle East.

Mikudagin mælti amerikanski forsetin eisini til, at NATO eigur at víðka um sítt virksemi í Irak.

Tað segði forsetin, eftir at hann hevði tosað í telefon við NATO-aðalskrivaran, Jens Stoltenberg.

Nato-hermenn til Miðeystur

Forsetin segði seg vilja hava, at NATO sendir fleiri hermenn til Miðeystur, tí tað sum hendir har, merkir allan heimin.

Jens Stoltenberg sigur, at tað, sum Trump sigur, ikki beinleiðis hevur við sær, at hermenn hjá NATO skulu í bardaga.

- Eg haldi ikki, at tað er best at senda nógvar hermenn frá NATO til ymisk lond at stríðast ímóti altjóða yvirgangi, sigur Jens Stoltenberg.

Hann vísti á, at NATO longu hevur sent 500 hermenn til Irak at venja trygdardeildirnar í landinum.