Iran hevur skotið ukrainska flogfarið niður

11.01.2020 - 09:38
AktueltÚtheimurin
Iran hevur skotið ukrainska flogfarið niður
Iran viðgongur nú, at tey, av misgáum, hava skotið ukrainska ferðafólkaflogfarið niður
 

Tað var Iran, sum skeyt niður ukrainska Boeing-737 ferðafólkaflogfarið, stutt eftir fráferð úr Teheran mikumorgunin.

Iranska hermegin skeyt flogfarið niður, av misgáum. Tað viðgongur Iran í almennari fráboðan í iranskum sjónvarpi í morgun. Hermegin lovar í sama viðfangi, at tey, sum hava ábyrgd av mistakinum, verða førd fyri ein hernaðardómstól.

Sambært iransku hermegini var flogfarið komið tætt uppat einum viðkvomum, hernaðarligum øki, tá tað varð skotið niður.

Iranski uttanríkisráðharrin, Javad Zarif, skrivar soleiðis á Twitter í morgun:

-Ein sorgardagur. Fyribils niðurstøðurnar í okkara innanhýsis kanningum vísir, at talan var um eitt menniskjaligt mistak, ið var framt orsakað av amerikanskum bráðræsni. Vit harmast, biðja um umbering og vísa samkenslu við okkara fólki, teimum avvarandi og teimum tjóðum, ið eru raktar.

Eisini iranski forsetin, Hassan Rouhani, vísir í Twitter-boðum sína samkenslu við teimum, ið eftir sita.

Iran hevur higartil víst aftur, at landið hevði nakað við flogvanlukkuna at gera.

Men í morgun staðfestir stýrið í Teheran, at iranska hermegin skeyt flogfarið niður.

176 fólk vóru umborð, og øll lótu lív.

 
Nýggjastu sendingar í ÚV
Hósdag 27. februar
Nón 27. februar 2020
105374
Hósdag 27. februar
Mono: Beach Boys (4:5)
105370
Hósdag 27. februar
LEITISSTEIN 24.02.2020 (1t)
105366
Hósdag 27. februar
Dagsins yrking - Millum aldurnar
104578
Nýggjastu sendingar í SV
Mikudag 26. februar
Úr savninum: Ymisk lív
105296
Mánadag 24. februar
Upp á gólv - í Skálanum
105214
Mánadag 24. februar
3-2
105221
Sunnudag 23. februar
Andakt við Carsten Fonsdal Mikkelsen
105169