Sigurð í Jákupsstovu stjóri á Umhvørvisstovuni

Sigurð í Jákupsstovu er nýggjur stjóri í Umhvørvisstovuni. 

Tað er Helgi Abrahamsen, landsstýrismaður í umhvørvis- og vinnumálum, ið hevur sett nýggja stjóran.

Í sambandi við setanina sigur landsstýrismaðurin, at talan er um ein stjóra, ið hevur holla vitan um orkumál. Og tað er neyðugt, nú stórar avbjóðingar standa fyri framman í fleiri av teimum málsøkjunum, sum Umhvørvisstovan tekur sær av.

Skipsførari og sivilverkfrøðingur

Sigurð í Jákupsstovu er 57 ára gamal. Hann er útbúgvin skipsførari og sivilverkfrøðingur, og hevur eisini eina Ph.d. frá DTU.

Sigurð í Jákupsstovu hevur starvsroyndir bæði í Føroyum og uttanlands.

Hann  hevur eisini drúgvar leiðsluroyndir, m.a. sum stjóri á Jarðfeingi og sum rektari á Fróðskaparsetri Føroya.

Sigurð í Jákupsstovu byrjar í starvinum tann 1. februar.