Frætta frá semingsfólkunum seinnapartin

Nú er ein vika síðani, at Lønardeildin sendi boð eftir Semingsstovninum, tí so langt var millum tað, sum Starvsmannafelagið krevur í lønarhækking, og tað, sum Fíggjarmálaráðið vil lata.

Semingsstovnurin hevur síðani kannað tilfar hjá pørtunum, og hann hevur eisini tosað við partarnar. 

Halda fram at samráðast við onnur feløg

Hóast Semingsstovnurin er boðsendur í samráðingunum við Starvsmannafelagið, heldur Lønardeildin fram við samráðingunum við onnur fakfeløg.

Tey eru higartil Lærarafelagið, Felagið Føroyskir Sjúkrarøktarfrøðingar og Akademikarafelagið. Sáttmálarnir, sum Lønardeildin hevur við 15 fakfeløg, fóru úr gildi 1. oktober í fjør.

Hjá 12 fakfeløgum á almenna arbeiðsmarknaðinum fara sáttmálarnir ikki úr gildi fyrr enn 1. oktober í ár, tí teir eru galdandi í trý ár. Lønarhækkingin hetta triðja árið hjá teimum er 2,5 prosent.