USA flytur diplomatar úr Wuhan undan corona

USA fer nú at flyta amerikanskar diplomatar úr kinesiska býnum Wuhan, har corona-virusið upprunaliga varð staðfest, upplýsir amerikanska uttanríkisráðið, sambært Reuters.

Pláss verður eisini fyri nøkrum fáum amerikanskum ríkisborgarum í flogfarinum, sum týsdagin fer úr Wuhan til San Fransisco.

Støðan álvarslig

Tey, sum eru í størsta vanda fyri at verða smittað, fáa framíhjárætt at sleppa við flogfarinum, sigur amerikanska uttanríkisráðið.

Kinesiski forsetin, Xi Jinping, sigur, at coronavirusið hevur elvt til eina álvarsliga støðu í Kina, og myndugleikarnir gera alt, teir eru mentir, at forða fyri, at smittan skal breiða seg.

Kanadiska stjórnin boðaði í nátt frá, at smittan er eisini staðfest í Kanada. 

Staðfest í Avstralia

Talan er um eitt fólk, sum hevur verið í Hubei-landspartinum í Kina, og sum verður hildið at vera smittað. Viðkomandi liggur á sjúkrahúsi, upplýsir kanadiska stjórnin.

Í gjár váttaðu avstralskir myndugleikar, at fýra fólk hava fingið staðfest smittuna. Avstralia er væl umtókt ferðamál hjá kinesarum, og tey fýra, sum eru smittað í Avstralia, hava øll verið í Wuhan í Kina.

Fríggjakvøldið varð coronavirus eisini staðfest í Fraklandi, sum er fyrsta evropeiska landið, har smittan er staðfest. Heimsheilsustovnurin, WHO, sigur, at enn er ov tíðliga at siga, um corona-virus er ein altjóða heilsukreppa.