Semingsroyndin byrjar í morgin

Semingsstovnurin hevur boðsent Starvsmannafelagnum og Lønardeildini í Fíggjarmálaráðnum til semingsroynd  í morgin klokkan 13.

Semingsroyndin millum partarnar verður á Hotel Hafnia. Terje Sigurðsson stendur fyri semingsroyndini saman við Símuni Absalonsen.

Næstsíðsta fríggjadag var greitt, at Starvsmannafelagið og Lønardeildin standa ov mikið langt frá hvørjum øðrum, til at partarnir sjávir megna at finna semju.

Síðani hevur Semingsstovnurin tosað við partarnar, hvør í sínum lagi. 

Endaspurtur

- Í morgin verður so farið undir endaspurtin, og vit ætla at halda á, til tað røkkur ella støkkur, sigur Terje Sigurðsson.

Semingsmaðurin hevur annars ongar viðmerkingar til krøvuni frá pørtunum. Terje Sigurðsson vil ikki siga, hvussu leingi hildið verður fram við semingsroyndini. 

- Vit brúka ta tíð, sum er neyðug, sigur semingsmaðurin.