Ungdómsting: Øll á miðnámi skulu fáa lestrarstuðul

Vantandi lestrarstuðul til ung undir 18 ár, sum eru á miðnámi, ger, at nógv 15, 16 og 17 ára gomul arbeiða fyri at hava ráð at vera á miðnámi.

Onnur bíða við at fara á miðnám, til tey eru vorðin 18 ár.

Ungdómstingið hevur samtykt uppskot frá næmingum í 9.a í Hoyvíkar skúla um at broyta lógina um lestrarstuðul, so øll, sum eru á miðnámi, fáa lestrarstuðul.

Tað kostar landskassanum 13,5 mió. kr. at geva teimum, sum eru yngri enn 18 ár, lestrarstuðul í staðin fyri bókastuðul.

Talan er um 800 næmingar.

12 mál

Atkvøtt varð um 12 mál á ungdómstinginum fyrrapartin.

Nøkur uppskot vórðu samtykt og onnur fullu.

Uppskotið um at minka tímatalið í fólkaskúlanum varð væl og virðiliga felt, og tað varð uppskotið um at lækka valaldurin niður í 16 ár eisini.

Men lítil prutl eiga at sleppa at koyra 50 km/t, hóast Ráðið fyri ferðslutrygd mælir frá tí, hevur ungdómstingið samtykt.