Verkfall í Reykjavík

Samráðingar millum næststørsta fakfelagið í Íslandi,  fakfelagssamtakið Efling, og kommununa slitnaðu í gjár, og farið verður tí í verkfall í dag klokkan 12.30, skrivar Morgunblaðið. 

Efling hevur 14.000 limir, og tilsamans 1850 kommunal starvsfólk fara í verkfall nú á middegi til á midnátt í kvøld. 

Verkfallið rakar 63 barnagarðar í Reykjavík, røktarheim og ruskinnsavningina.

Næsta semingsroynd verður í morgin kl. 15, og spyrst einki burtur úr tá, halda verkføllini fram í ovurmorgin, og so týsdagin, mikudagin og hósdagin í næstu viku.

Er framvegis eingin avtala gjørd 17. februar, byrjar eitt verkfall tann dagin, og heldur fram í óasetta tíð, skrivar Morgunblaðið.