Fýra eru ársins fyrstuhjálparar

Tey fýra, Jákup Petur Joensen, Allan Jacobsen, Beinta Virgarsdóttir og Linda Kjærbo-Veyhe, vunnu heiðurin sum ársins fyrstuhjálparar 2019.

Tað kunngjørdi Reyði Krossur á samkomu seinnapartin.  

Tey fingu heiðurin fyri at hava givið manni lívbjargandi fyrstuhjálp, til sjúkrabilur kom á staðið.

Tað var 27. desember í fjør, at ein 53-ára gamal maður fekk ein hjartatilburð í bili sínum í Vági. Tey fýra vóru øll nærindis, og komu beinan vegin manninum til hjálpar.

Hjartasteðg

Tað vísti seg, at maðurin hevði hjartasteðg.

Tey gjørdu skjótt av, fingu mannin úr bilinum, og fóru at veita fyrstuhjálp. Eisini boðaðu tey alarmsentralinum frá og útvegaðu hjartastartara, sum var nærindis

Tey hildu fram, til sjúkrabilurin kom, og Reyði Krossur sigur, at tey fýra helst hava bjargað lívinum á manninum.

Øll tey tilnevndu fingu eitt heiðursbræv frá Reyða Krossi og blómur frá Betri Trygging, og ársins fyrstihjálpari eisini fekk eina peningaupphædd.

Meira verður at frætta um Ársins fyrstahjálpararar í útvarpstíðindunum klokkan 18.