Átta mál um marknaforðingar í ríkisfelagsskapinum

Landsstýrini í Føroyum og í Grønlandi og danska stjórnin arbeiða við átta málum, sum hava felagsheitið marknaforðingnar í ríkisfelagsskapinum.

Tað sæst í árliga yvirlitinum, sum Astrid Krag, almannamála- og innanríkisráðharri, hevur sent Føroyanevndini hjá fólkatinginum.

Hon sigur, at hetta seinasta árið eru tvær marknaforðingar burturbeindar. 

Koyrikort og fyritíðarpensjón

Onnur er grønlendska koyrikortið, sum nú kann býtast við eitt danskt, tá fólk flyta úr Grønlandi til Danmarkar.

Hin er fyritíðarpensjónin. Lógarbroytingarnar um hana komu í gildi 1.januar í ár.  

Marknaforðingar í ríkisfelagsskapinum eru, tá rættarstøðan er ymisk í teimum trimum londunum.

Tað kann koma tvørt fyri hjá teimum, sum flyta millum londini í ríkinum.