Kunngerðin um vinnuligar royndir ikki klár enn

Hendan vikan gongur og tað mesta av næstu viku eisini, áðrenn kunngerðin um kvotur til vinnuligar royndir og verkætlanir, sum hava við sær menning, nýskapan og virðisøking í at gagnnýta uppsjóvarfisk, verður lýst.

Uppskotið skal viðgerast politiskt fyrst. Tað var á landsstýrisfundi í gjár. Men politiska viðgerðin er ikki liðug.

Uppskotið hevur verið í Fiskivinnuráðnum, sum tó ongar viðmerkingar hevði um innihaldið.

Verða stórar broytingar gjørdar nú, verður helst neyðugt at senda uppskotið aftur í Fiskivinnuráðið, sigur Jacob Vestergaard, landsstýrismaður.

Hevur skund

Kunngerðin hevur eisini skund, tí hon umfatar nógvan svartkjaft, og svartskjaftsvertíðin er byrjað.

Men kunngerðin má eisini bíða eftir kunngerðini um norðhavssild, sum ikki er lýst enn. 

Tí 8,7 prosent av norðhavssildarkvotuni skulu brúkast til vinnuligar royndir og verkætlanir, sum hava við sær menning, nýskapan og virðisøking í at gagnnýta uppsjóvarfisk.