Hasfjord fer nú í royndarsigling

Sáttmálaviðurskiftini hjá manningini umborð á Hasfjord eru nú komin í rættlag.

Tað upplýsir Jan Mortensen, stjóri á Lønardeildini. 

Nýggjasta skipið í flotanum hjá Strandferðsluni er flokkað sum Teistin, og manningin verður lønt samsvarandi hesi flokking.

Hasfjord kom á Havnina úr Noregi hósdagin. Í løtuni verða smærri umvælingar og ábøtur gjørdar á skipið á skipasmiðuni Mest, og tað arbeiðið verður liðugt fyrsta dagin, sigur Hilmar Eliasen, stjóri á Strandferðsluni.

Eisini verður trygdarsýn gjørt á Hasfjord í dag.

Royndarsigling

Stjórin á Strandferðsluni upplýsir, at fyrstu dagarnar fer Hasfjord í royndarsigling, soleiðis at manningin fær eina greiðari fatan av, hvussu skipið roynist, eitt nú tá tað skal leggja at.

- Eftir royndarsiglingina fara vit at leggja ferðaætlanina fyri Hasfjord, sigur Hilmar Eliasen.

Hasfjord er fyrst og fremst ætlaður at sigla við tungum akførum og farmi um Skopunarfjørð. Skipið tekur eisini 12 ferðafólk. 

Skipið er bygt í Noregi í 1975, tað er góðar 40 metrar langt og kostaði 10 milliónir kr. at keypa.