Føroyingar arbeiða mest í Evropa

Føroyka arbeiðsfjøldin er tann virknasta í øllum Evropa. Tað vísir ein uppteljing, sum Hagstovan hevur gjørt.

Av teimum stívliga 37.000 fólkunum, sum eru millum 15 og 74 ára gomul, eru umleið 32.000 í arbeiðsfjøldini - tað er, at tey eru vinnuliga virkin.

Vinnutíttleikin, sum er arbeiðsfjøldin í prosentum av samlaða fólkatalinum, er sostatt 85,4 prosent. Tað er størsti títtleiki í Evropa. Ísland hevur næststørsta vinnutíttleikan.

Hjá monnum er títtleikin 87 prosent, og hjá kvinnum er hann 84 prosent.

Størstur í Evropa

Um hugt verður at ymsu økjunum í Føroyum, sæst, at vinnutíttleikin er størstur í Eysturoynni við 88 prosentum. Í Suðurstreymi og Norðoyggjum er hann 86 prosent.

Vinnutíttleikin er minstur í Sandoynni og í Suðuroy. Har er hann 79 prosent.

Bæði hjá monnum og kvinnum er tann størsti munurin millum Føroyar og Ísland og hini londini í Evropa, at tey ungu í hesum báðum londum eru nógv meira vinnuliga virkin enn aðrastaðni, og at tey eldru eru nógv longur vinnuliga virkin enn aðrastaðni.

Fara tíðliga til arbeiðis

Bæði í Føroyum og Íslandi eru tey ungu longu fyri 20 ára aldur á umleið 75 prosentum í vinnutíttleika, samanborið við 50 prosent í Danmark og um 20 prosent í ES-londunum sum heild.

Enn størri er munurin hjá teimum eldru. Og tá tað snýr seg um tey elstu,  65-74 ára gomlu, eru Føroyar í serstøðu við einum vinnutíttleika upp á 50 prosent. Í Íslandi er hann umleið 35 prosent, meðan hann er niðri á 10-15 prosentum í Danmark og ES-londunum sum heild, skrivar Hagstovan.