Corona-tilburðurin: 14 fólk eru avbyrgd

Eftir at fyrsti føroyingurin hevur fingið staðfest corona-virusið, eru tilsamans 14 fólk avbyrgd.

Tað hevur Lars Fodgaard Møller, landslækni, gjørt av, eftir at hann hevur kannað teir persónar, sum smittaði føroyingurin hevur verið í sambandi við, sigur Heilsumálaráðið í tíðindaskrivi í kvøld. 

Tað er framvegis bara ein persónur í Føroyum, sum hevur fingið staðfest corona-virusið. Hini trý í húskinum hjá viðkomandi eru kannað, og øll úrslitini vóru negativ. 

Smittaði føroyingurin og húski hansara verða kortini øll avbyrgd við hús næstu14 dagarnar, sigur Heilsumálaráðið.