Heita á barrir og náttklubbar um at stongja

Danskir mynduleikar mæla nú frá at tiltøk við fleiri enn 100 luttakarum verða hildin. Á tíðindafundi fyri løtu síðan varð kunngjørt, at talið av coronasmittaðum er tíggjufaldað síðan mánadagin.

Nú hava 514 danir fingið staðfest smittuna, og tí verða tiltøkini herd mundandi. Forsætisráðharrin kom við eini áheitan um, at avlýsa alt virksemi, sum savnar nógv fólk.

Forsætisráðharrin heitti á náttklubbar og barrir um at stongja fyri at fyribyrgja smittuni. Skúlar, dagstovnar og øll almenn innandura tilboð stongja næstu tvær vikurnar.

Øll starvsfólk í tí almenna, sum ikki varða av eini kritiskari funktión, verða send heim í tvær vikur. Heitt verður á privatar arbeiðsgevarar um at gera tað sama.