Svøríki og Noreg hjálpa eisini vinnulívinum

Bæði svenskir og norskir myndguleikar taka nú stg til at hjálpa vinnulívinum, sum er meint rakt av corona-kreppuni.

Svenska stjórnin hevur kunngjørt eina hjálparætlan fyri góðar 200 milliardir krónur í okkara peningi.

Starvsfólk verða tryggjað 90 prosent av lønini. Arbeiðsgevararnir lata 50 prosent og tað almenna restina, upplýsti Magdalena Andersson, fíggjarmálaráðharri, á tíðindafundi í morgun.

Eisini norska stjórnin hevur kunngjørt eina hjálparætlan.

Starvsfólk, sum verða send til hús, hava rætt til fulla løn í 20 dagar. Arbeiðsgevararnir rinda løn fyrstu tveir dagarnar, og tað almenna veitir lønartrygd fyri næstu 18 dagarnar, skrivar NRK.

Í gjár kunngjørdi danska stjórnin eina hjálparætlan fyri vinnulívið.

Starvsfólk fáa endurgjald fyri 75 prosent av lønini, um teir verða sendir til hús. Hjá tímaløntum verður endurgjaldið 90 prosent av lønini.