890 milliónir kr. í lønum í februar

Í februar vórðu umleið 890 milliónir kr. goldnar í lønum. Tað eru umleið 55 milliónir kr. meira enn sama mánað í fjør, vísa tøl hjá Hagstovuni.

Tølini vísa, at vøksturin í lønargjaldingunum stendur við, hóast vøksturin í talinum av løntakarum er minni, enn hann hevur verið, sigur Hagstovan.

Av teimum 890 milliónunum, sum vórðu goldnar í lønum í februar, fingu mannfólk góðar 582 milliónir, ella 65 prosent. Konufólk fingu 309 milliónir, ella 35 prosent av øllum lønargjaldingunum.

Munurin millum kynini veksur framvegis, sigur Hagstovan. 

Umleið 65 prosent av øllum lønum verða goldin í almennu og privatu tænastuvinnunum, 20 prosent í fiskivinnu og aðrari tilfeingisvinnu, og 15 prosent í byggivinnu og aðrari tilvirking.