Næmingar á Heilsuskúlanum fingið arbeiðsboð

Eldraøkini hava heitt á næmingar á Heilsuskúla Føroya um at taka vaktir, meðan tey eru heima og fáa fjarundirvísing. Tað upplýsir Heilsuskúli Føroya í skrivi. Undirvísingarstýrið hevur góðtikið áheitanina.

Heilsuskúlin hevur í løtuni 70 næmingar úr øllum landinum í skipanini. Hesir hava í dag fingið fyrispurning frá eldraøkinum í Tórshavn um at taka vaktir fyri at avlasta verandi skipanir. Onnur øki hava eisini víst á, at tørvur er á hesum.

– Fjarundirvísingin á Heilsuskúlanum verður í løtuni tillagað soleiðis, at hetta er gjørligt. Støðan verður tikin upp og eftirmett dagliga fyri at tryggja, at næmingarnir eisini fáa nøktandi læring í teirra útbúgvingum, stendur víðari í skrivinum.

Heilsuskúli Føroya heitir samstundis á tey, sum hava tørv á hjálp frá næmingum um at seta seg í samband við skúlan á teldupost: heilsuskulin@skulin.fo.