1000 fólk kosta ALS 22 mió. kr. um mánaðin

Tað fer at kosta ALS nógvar milliónir krónur at skulu geva fólki løn, sum eru send til hús, men ikki eru uppsøgd.

Fáa til dømis 1000 fólk fult gjald úr ALS, kostar tað 21,6 mió. kr. um mánaðin.

Hjálparpakkin hjá landsstýrinum, sum løgtingið samtykti í gjár, kom í gildi 12.mars, og er galdandi til 30.juni.

Hann kostar tí ALS 75,6 mió. kr., um 1000 fólk fáa fult ískoyti.

Av tí at fiskimenn nú eisini fáa pengar frá ALS, er avrátt, at Trygdargrunnur fiskivinnunar rindar ALS fyri teir.

Dagpengar eisini við

Dagpengarnir eru eisini í hjálparpakkanum.

Um vit aftur her taka 1000 fólk, sum fáa fullan dagpening, kostar hetta landskassanum 60 til 65 mió. kr. hetta til 30.juni.

Fólk, sum fáa fullan dagpening, fáa 20.000 til 22.000 kr. um mánaðin, tá arbeiðsmarknaðargjøld og eftirlønargjald eru tald við.  

Harafturat kemur, at land og kommunur missa skatt.

Almannamálaráðið sigur, at uppskotið tryggjar, at skattainntøkurnar hjá landi og kommunum í ein ávísan mun verða varðveittar, hóast virksemið í samfelagnum minkar nógv.