Danir fara at gera fleiri koronaroyndir

Danir fara nú at kanna nógv meir fólk fyri koronavirus.

Tað hevur danska heilsumálaráðið gjørt av, saman við millum annað heilsustýrinum og serumsstovninum, skrivar danska kringvarpið.

 - Okkara ætlan er, at nógv fleiri í Danmark nú skulu kannast fyri Covid-19 , sigur heilsumálaráðharrin, Magnus Heunicke, í einum tíðindaskrivi.

Hetta hendir, eftir at donsku heilsumyndugleikarnir hava fingið ákoyringar fyri ikki at gera nóg nógvar koronaroyndir.

Heimsheilsustovnurin, WHO, viðmælir, at øll, sum vísa sjúkueyðkenni, skulu kannast, og tað er líkt til, at danir nú taka avleiðingarnar av hesum.

Leggur trýst á heilsuverkið

Nýggja útspælið fer at leggja stórt trýst og heilsuverkið, sum longu nú manglar útgerð at gera royndirnar við.

 - Vit arbeiða hart saman við almennum og privatum partum, fyri at økja um orkuna at gera royndir, og eg fari, saman við amtunum, at tryggja, at nýggja royndarætlanin verður útinnt, sigur Magnus Heunicke, sambært dr.dk.

Danmark slepti annars tíðliga, at kanna øll tey, sum høvdu sjúkueyðkenni. 

Í løtuni verða bert tey kannað, sum hava sjúkueyðkenni, sum krevja, at tey verða innløgd á sjúkrahúsið, men nú sær út til, at Danmark í øllum førum nærkast viðmælunum frá WHO.