Útgongubann í Ný Sælandi frá mikudegnum

Mikudagin verður forboð sett fyri at ganga úti í Ný Sælandi. Tað upplýsir Jacinda Ardern, forsætisráðharri í landinum,

Forboðið hevur við sær, at borgarar skulu vera við hús, og skúlar og lærdir háskúlar aftur. Bara handlar, sum selja neyðsynjarvørur, sleppa at hava opið.

Mugu ikki ganga saman við øðrum

Tó verður loyvt fólki í Ný Sælandi at fara út fyri at dyr at spáka, men tey skulu ganga einsamøll, og ikki saman við øðrum.

Útgongubannið í Ný Sælandi verður í gildi í fýra vikur. Ikki er loyvt at fara í biograf, venjingarmiðstøðir ella á matstovu.

102 fólk eru skrásett at hava koronasmittuna í Ný Sælandi, men eingin er deyður. Fimm milliónir fólk búgva í landinum.

Dýrt, men neyðugt

Jacinda Ardern, forsætisráðharri, stúrir fyri, at talið á smittaðum verður tvífaldað eftir fáum døgum, um tiltøk ikki verða sett í verk alt fyri eitt.

Forsætistáðharrin viðgongur, at strongu tiltøkini fara at kosta Ný Sælandi nógv búskaparliga, men tey fara at bjarga lívi, sum hon tekur til.

Ein uppgerð frá John Hopkins universitetinum vísir, at 335.000 fólk hava fingið koronasmittuna í øllum heiminum. 100.000 fólk eru vorðin frísk. Korona hevur kravt umleið 15.000 mannalív.