Landslæknin ikki í sóttarhald, tá hann kemur í dag

Lars Fodgaard Møller, landslækni, sum kemur til Føroya í dag úr Danmark, fer ikki í sóttarhald sum onnur, sum koma til Føroya.

Vanligu reglurnar um sjálvboðið sóttarhald eru ikki galdandi fyri fólk, sum hava eitt lívsneyðugt starv at røkja, so sum fólk, sum arbeiða í heilsuverkinum.

Tim Volmer Jensen, sum hevur verið virkandi landslækni, meðan Lars Fodgaard Møller er í Danmark, er heldur ikki í sóttarhaldi, meðan hann er í Føroyum.

Ikki havt samband við onnur enn familjuna

Lars Fodgaard Møller sigur, at neyðugt verður uttan iva hjá Styrelsen for patientsikkerhed at senda fólk til Føroya í framtíðini, og tey fara heldur ikki í sóttarhald.

Landslæknin sigur, at hann ikki hevur havt samband við onnur enn familjuna hjá sær, meðan hann hevur verið í Danmark.

Og sjálvandi fer hann at ansa eftir, nú hann seinni í dag verður aftur í Føroyum. Men talan verður ikki um sóttarhald, sigur hann.