Dagrøktarar kunnu arbeiða á eldraøkinum

Dagrøktarar í dagrøktini kunnu fyribils verða fluttir á eldraøkið at arbeiða.

Tað eru Kommunala Arbeiðsgevarafelagið og Føroya Arbeiðarafelag vorðin samd um.

Avtalan fevnir um dagrøktarar, sum av arbeiðsgevaranum eru sendir heim, tí einki arbeiði er, men sum hava førleika at røkja uppgávur á eldraøkinum. 

Varðveita lønina

Viðvíkjandi lønini er útgangsstøðið, at starvsfólkini varðveita ta løn, sum tey hava rætt til sambært galdandi sáttmála partanna millum. 

Avtalan verður endurskoðað so hvørt, og dettur burtur av sær sjálvari,  tá korona-bylgjan ikki longur ávirkar tørvin á starvsfólkum, ávikavist í dagrøktini og á eldraøkinum, - tó ikki seinni enn 1. mai.

Avtalan kann tó verða longd eftir tørvi, stendur í skrivi frá Kommunala Arbeiðsgevarafelagnum.