Umsetningurin hjá Airbnb 22 mió. kr. í 2018

Taks hevur nú roknað út, hvussu nógv landskassin skal hava í skatti frá fólki, sum leiga bústað gjøgnum Airbnb-skipanina.

Taks boðar frá, at umsetingurin hjá Airbnb í Føroyum var 22 mió. kr. í 2018.

Hetta gav 13 milliónir krónur í skattskyldigari inntøku.

Í miðal hevði hvør útleigari slakar 74.000 kr. í umsetningi í 2018, sigur Taks.

Kunningarátak

Í fjør vár hevði Taks eitt kunningarátak fyri at fáa fólk at lata inn rættan airbnb-roknskap.

Átakið gjørdi góðan mun, tí nógv fleiri roknskapir eru komnir nú, og teir eru eisini rætt uppsettir.

Tey, sum ikki hava latið Taks airbnb-roknskap, verða kravd eftir skatti, sum er ásettur sambært meting hjá Taks.