Boris Johnson er í batning

Viðgerðin riggar væl, og í gjár setti Johnson uppundir seg í songini, sigur Downing Street.

Forsætisráðharrin skal framhaldandi verða í intensivari viðgerð, men hann hevur góðar vónir.

- Hetta er ein áminning um, at virusið kann raka okkum øll, sigur Rishi Sunak, kunningarfólk í Downing Street.

Johnson fær sonevnda iltviðgerð, men andar sjálvur. 

55 ára gamli Boris Johnson fekk staðfest koronavirusið fyri nærum tveimum vikum síðani, og seinasta sunnukvøld varð hann innlagdur. Tað eru nógvar atfinningar ímóti Borisi Johnson og háttinum sum hevur verið nýttur at basa korona-smittuni. Ført verður fram, at stjórnin bíðaði alt ov leingi, - til 23. mars, við at seta neyðug tiltøk í verk. 

Áðrenn tað segði Boris Johnson, at hann ikki ræddist virusið, og at hann fór at halda fram við at taka í hondina á fólki.

Seinu tiltøkini gera, at fleiri onnur fólk í stjórnarumsitingini eru smittað, - millum annað ráðgevin hjá Borisi Johnson, Dominic Cummings, og innanríkisráðharrin, Mark Hancock. Cummings er í sóttarhaldi, meðan Hancock er vorðin frískur aftur. Unnustan hjá Johnson, Carrie Symonds, hevur eisini verið illa sjúk við korona-sjúkueyðkennum.

Uttanríkisráðharrin, Dominic Raab, stýrir landinum, meðan Johnson er sjúkur, - men hann hevur avmarkaða heimild. Hann kann ikki koyra stjórnarlimir frá, og hann skal ikki halda vikuligan fund við Elizabeth drotning, eins og forsætisráðharrin skal. 

Tað er eisini ógreitt, hvør hevur myndugleikan til at leingja ella strika tilmælini í Bretlandi, tá tey fara úr gildi eftir páskir.