Grønlendingar herða eftirlitið við covid-19

Frá í dag skulu øll, ið koma til Grønlands, kannast fyri COVID-19, áðrenn tey koma til landið, og tá tey eru komin til Grønlands.

Eingin nýggjur tilburður er staðfestur í fleiri vikur, og soleiðis skal tað eisini vera, ætla myndugleikarnir í Grønlandi, skrivar KNR.

Men samstundis er talið a fólki, sum hava fingið játtað innferðarloyvi - serliga orsakað av arbeiði - vaksið. Tí vilja myndugleikarnir hava fleiri og betri kanningar.

Tað merkir, at frá í dag er tað eitt krav, at ferðafólk verða kannað í Danmark, áðrenn tey fara til Grønlands, og at tey eisini verða kannað fimm dagar eftir at verða komin til landið.

- Smittuvandin økist, samstundis sum vit loyva fleiri ferðandi inn í landið. Tí herða vit nú eftirlitið, sigur Henrik L. Hansen, landslækni í Grønlandi, sambært KNR.

Tað verður framvegis eitt krav, at øll fólk, sum koma til Grønlands, fara í sjálvboðið sóttarhald.