Tingformaðurin formaður í grein 25-nevndini

Grein 25 nevndin, sum skal viðgera broytingar í stýrisskipanini, hevur nú skipað seg, og hon hevur fund í dag.

Jógvan á Lakjuni í Fólkaflokkinum er formaður í nevndini, og Ingilín Didriksen Strøm í Javnaðarflokkinum er næstforkvinna.

Nevndin varð vald 6. mars.

Hvør flokkur hevur eitt fólk í nevndini. 

Í nevndini eru eisini Frimodt Rasmussen í Sambandsflokkinum, Hervør Pálsdóttir í Tjóðveldi, Bill Justinussen í Miðflokkinum, Bjarni Kárason Petersen í Framsókn og Kristin Michelsen í Sjálvstýri.

Maður til fólk

Tingkvinnurnar, Ingilín Didriksen Strøm í Javnaðarflokkinum og Hervør Pálsdóttir í Tjóðveldi, mæla til at broyta stýriskipanarlógina.

Tær vilja, at orðið maður í stýriskipanarlógini skal broytast til orðið fólk.

Løgtingsmaður skal verða løgtingsfólk til dømis. Og embætismaður skal eita embætisfólk.

Nevndir, sum verða settar eftir grein 25 í tingskipanini, sita til nevndin hevur avgreitt setning sín og í longsta lagi til tingsetan endar á ólavsøku.

Skal stýriskipanarlógin broytast, skal uppskot um tað samtykkjast í tveimum løgtingum, val skal vera ímillum samtyktirnar.